ഒരു ക്രൂയിസ് യാത്രയില്ലാതെ ഗോവൻ കാഴ്ചകൾ പൂർണ്ണമാവില്ല. ഗോവയിലെത്തുന്ന ആരാണ് ഒരു ആഘോഷത്തിന്റെ മൂഡിലേക്ക് മാറാതിരിക്കുക...
ആഘോഷം അതിൻറെ ഉച്ചസ്ഥായിയിൽ അനുഭവിക്കാൻ ക്രൂയിസുകളെക്കാൾ മെച്ചപ്പെട്ട മറ്റൊന്നില്ല തന്നെ..
നമ്മുടെ പോക്കറ്റിന്റെ വലിപ്പത്തിനും ഡിമാന്റിനും അനുസരിച്ച് പലതരത്തിലുമുള്ള ക്രൂയിസുകൾ ലഭ്യമാണ് ഗോവയിൽ. 400 രൂപ മുതൽ ലക്ഷങ്ങൾ വരെ കൊടുക്കേണ്ടുന്ന ക്രൂയിസുകളുണ്ട്.
ഗോവയുടെ വശ്യമനോഹരമായ ഗ്രാമീണ സൗന്ദര്യവും ഭൂദൃശ്യങ്ങളും ആസ്വദിച്ച് വില്ലേജുകളും പഴയ ചർച്ചുകളുമൊക്കെ കണ്ട്, കടൽ വിഭവങ്ങൾ നിറഞ്ഞ ഗോവൻ ഫുഡും കഴിച്ച് അവിസ്മരണീയമായ ഒരു യാത്ര ആഗ്രഹിക്കുന്നവർ ഹൗസ് ബോട്ട് ക്രൂയിസിൽ തന്നെ കയറണം. എന്നാൽ സംഗീതവും നൃത്തവും ഒക്കെ ആസ്വദിച്ച് മാണ്ഡവി നദിയിലൂടെ ഒരു രാത്രി യാത്ര മതിയെങ്കിൽ സാന്താമോണിക്കയിൽ നിന്നും രാത്രി 8.30ന് പുറപ്പെടുന്ന ഡിന്നർ ക്രൂയിസ് ആണ് തിരഞ്ഞെടുക്കേണ്ടത്.
ഗെയിമും ഫണ്ണും മറ്റു വിനോദങ്ങളും ഒപ്പം സംഗീതവും നൃത്തവും ഒക്കെ സുഹൃത്തുക്കളോടൊപ്പം അടിച്ചുപൊളിച്ച് ആഘോഷിക്കാൻ 24 മണിക്കൂറും പ്രവർത്തിക്കുന്ന കാസിനോകൾ നമ്മെ കാത്തിരിക്കുന്നുണ്ട്. ജലകേളികൾക്ക് പ്രാധാന്യം കൊടുത്തിരിക്കുന്ന കറ്റാമാരൻ ക്രൂയിസ്, നദിയിലൂടെ യാത്ര ചെയ്തുകൊണ്ട് സൂര്യാസ്തമയം കാണാനും കാർണിവൽ വില്ലേജിലേക്ക് പോകാനും സൺസെറ്റ് റിവർ ക്രൂയിസ്, ഷാംപെയിൻ അടക്കം വിളമ്പുന്ന ഷാംപെയിൻ ബ്രേക്ക്ഫാസ്റ്റ് ക്രൂയിസ്, അറബിക്കടലിലെ വിസ്മയ കാഴ്ചകളൊരുക്കുന്ന ലക്ഷ്വറി ക്രൂയിസ്, ഡോൾഫിൻ കാഴ്ചകളുടെ മായാലോകം ഒരുക്കിത്തരുന്ന ഐലൻഡ് ക്രൂയിസ്..
അങ്ങനെയങ്ങനെ നീളുകയാണ് ക്രൂയിസുകളുടെ ലോകം. ഇനി ഇതൊന്നുമല്ല, ഏറ്റവും ഇഷ്ടമുള്ള ആളോടൊപ്പം ഇത്തിരി സമയം ഒരു ശല്യവും ഇല്ലാതെ ചെലവഴിക്കണോ? ഒരു പേഴ്സണൽ ക്രൂയിസ് എടുത്ത് യാത്ര ചെയ്താൽ മതി. ഒരു ചെറിയ പാർട്ടിയൊക്കെ നടത്താനും ആവശ്യമായ സമയം വെള്ളത്തിലൂടെ ഒഴുകി നടക്കാനും ആഘോഷിക്കാനും ആണെങ്കിൽ ഫ്രീ സ്പിരിറ്റ് ക്രൂയിസ് റെഡിയാണ്. അങ്ങനെ പല തരത്തിൽ ആഘോഷങ്ങൾക്ക് നിറം പകരുന്ന ക്രൂയിസിലൂടെയുള്ള ഒരു യാത്ര ചെയ്യാതെ ഒരു യാത്രികനും ഗോവയിൽ നിന്നും മടങ്ങി പോരാനാവില്ല.
ഗായകരുടെയും നർത്തകരുടെയും പ്രകടനം വെറുതെ കണ്ടു നിൽക്കാനല്ല, ആ ആവേശം കാഴ്ചക്കാരിലും സന്നിവേശിപ്പിച്ച്, സദസ്സിനെയാകെ ഇളക്കിമറിച്ച്, ആഘോഷം അതിൻറെ ഉച്ചസ്ഥായിയിൽ എത്തുക്കുകയാണ് ക്രൂയിസിലെ കലാകാരന്മാർ ചെയ്യുന്നത്. വൈദ്യുത വർണ്ണത്താൽ മുങ്ങി നിൽക്കുന്ന അടൽ സേതുവിൻറെ മായിക സൗന്ദര്യം ആസ്വദിച്ച്, ഉയർന്നുപൊങ്ങുന്ന സംഗീതത്തിനൊപ്പം ചുവടുവെച്ച്, കൂട്ടത്തിൽ നുരഞ്ഞു പൊന്തുന്ന അല്പം ലഹരിയുമായി മാണ്ഡവിയുടെ ഓളപ്പരപ്പിലൂടെ 2-3 മണിക്കൂർ യാത്ര കഴിഞ്ഞു വരുമ്പോൾ ഒരു ദേവലോക സന്ദർശനം നടത്തിയതാണെന്ന പ്രതീതി ഉണ്ടായില്ലെങ്കിലല്ലേ അത്ഭുതമുള്ളൂ...
എന്തായാലും എല്ലാക്കാലത്തും ഓർമ്മയിൽ സൂക്ഷിക്കാൻ ഗോവയുടെ ഒരു ഒന്നാന്തരം സമ്മാനം...
No comments:
Post a Comment