ദേവസുന്ദരി

തിലോത്തമ..
സ്വർഗ്ഗലോകത്തിലെ ദേവനർത്തകിയെ പ്പോലെ സുന്ദരി ...
പക്ഷേ സ്വർഗ്ഗീയ സുഖം പോട്ടെ,
ഭൂമിയിലെ സാധാരണ ജീവിതം പോലും കയ്യെത്തി പിടിക്കാനാകാത്തവൾ...
അങ്ങകലെ വടക്കുകിഴക്കു നിന്നും
അശാന്തിയുടെ ദുരിതപർവ്വം താണ്ടി,
ഇങ്ങ് തെക്കേയറ്റം
സമാധാനത്തിൻ്റെ തുരുത്തിൽ എത്തിപ്പെട്ടവൾ....
തുന്നൽ പഠനത്തിനും
ഒപ്പം ജോലിയിലൂടെ വരുമാനത്തിനുമായി
ഏജൻറ് മുഖാന്തരം ആസ്സാമിൽ നിന്നും പുറപ്പെട്ട് തിരുപ്പൂരിൽ എത്തി.
കെണിയിൽ അകപ്പെടുമെന്ന് മനസ്സിലാക്കി, രക്ഷപ്പെട്ട് ചെന്നൈയിലെത്തിയ ആറ് പെൺകുട്ടികളിൽ ഒരുവൾ..
ചെന്നൈയിലും എറണാകുളത്തുമുണ്ടായിരുന്ന ആസാം സ്വദേശികളുടെ സഹായത്തോടെ, കേരളത്തിൽ എത്തിയിട്ട് ഇപ്പോൾ 10 മാസം.
ഹോസ്റ്റലിൽ താമസിച്ച്, ഒരു സൂപ്പർമാർക്കറ്റിൽ ജോലി ചെയ്യുന്നു...
ആ മുഖത്തിപ്പോൾ ആശ്വാസത്തിൻ്റെ പുഞ്ചിരി...
'സുഖമാണോ ദീദീ' എന്ന ചോദ്യത്തിൽ സ്നേഹത്തിൻ്റെ പൂത്തിരി..
ഒഴുക്കില്ലാത്ത ഹിന്ദിയിൽ എൻറെയും തപ്പിത്തടഞ്ഞ മലയാളത്തിൽ തിലോത്തമ യുടെയും
സൗഹൃദം വളരുകയാണ്....