മുതുവല്ലൂർക്കാഴ്ചകൾ- 1

കാഴ്ചകൾ അവസാനിക്കുന്നില്ല......

നാട്ടിടവഴികളിലൂടെ,
മരങ്ങൾ തീർക്കുന്ന തണലാഴങ്ങളിലൂടെ,
അലസഗമനം നടത്തുന്ന തെളിനീർചാലിൻ്റെ കരയിലൂടെ,
ഉയർന്നുപൊങ്ങിയ പുൽക്കൂട്ടങ്ങൾക്കിടയിലൂടെ, പേരറിയുന്നതും അറിയാത്തതുമായ പൂക്കളുടെ നാടൻ ഭംഗിയിലൂടെ,
ഇളം തെന്നലിൻ്റെ കുളിർ തലോടലേറ്റ്, പള്ളിക്കൂടത്തിലേക്ക്,
ഒരു ഗ്രാമനടത്തം....

ഓർമ്മകൾ കുതിക്കുന്നു, 25 വർഷം പുറകിലേക്ക്... തോട് കടന്ന്, പാടവരമ്പിലൂടെ, പറമ്പിലൂടെ, പറങ്കിമാവിൻ കൂട്ടത്തിനിടയിലൂടെ
സൊറ പറഞ്ഞു നടന്ന ഒരുകാലം...
ഔദ്യോഗിക ജീവിതത്തിലെ ആദ്യ വർഷങ്ങൾ... ചെറാങ്കുത്തെന്ന നിഷ്കളങ്ക ഗ്രാമജീവിതം ഇരുകയ്യുംനീട്ടി ആശ്ലേഷിച്ച ജീവിതകാലം.
സ്നേഹിക്കാൻ മാത്രം അറിയുമായിരുന്ന
ഒരു നാടിൻ്റെ,
ഒരു ജനതയുടെ
ഹൃദയത്തിൽ വസിച്ചിരുന്ന കാലം.
സമാനമായ സാഹചര്യങ്ങളിലേക്ക് ഒരു പുനർ നടത്തം
ഇക്കുറിയും മലബാർ തന്നെ തട്ടകം
മുതുവല്ലൂർ എന്ന കൊച്ചു ഗ്രാമം ....
കുളിർമയുള്ള കാഴ്ചകൾസമ്മാനിച്ചുകൊണ്ട്

അതെ തുടങ്ങിയിട്ടേയുള്ളൂ, ഈ ഗ്രാമജീവിതം ഇനിയും ഒരുപാട് കാണാനുണ്ട്
അനുഭവത്തിലൂടെ പറയാനുമുണ്ട്
കാഴ്ചകൾ അവസാനിക്കുന്നേയില്ല.....

11.11.2018